14. 12. 2021: В Белеградї одсвятковали Меджінародный день людьскых прав з меншынами 

В Палаці Сербії в Белеградї 10-го децембра 2021-го року одбыв ся Форум людьскых прав – Сербія 2021. Форумом святковав ся Меджінародный день людьскых прав, котрый припав на тоту дату. Інформовала о тім аґентура Рутенпрес.

Святочну і робочу подїю одкрыла міністерка про людьскы права, права меншын і соціалный діалоґ Ґордана Чоміч. Шефка людьскоправного і меншыного резорту припомянула, же єдным із першых засїдань новоформованого міністерства было засїданя з представителями народных совітів, орґанів меншыновых самосправ.

Тоты одбыли ся кінцём новембра минувшого року, і мали за цїль пояснити проблемы у вырїшованю меншыновых прав. Одвтогды аж дотеперь зреалізовало ся много засїдань, стрїч, діалоґів і форумів, жебы ся злїпшыло поставлїня меншын, жебы ся рїшыли актуалны проблемы, з котрыма етнічны ґрупы і народностны меншыны стрїчають ся.

На події были і три панеловы діскусії присвячены темам людьскых і меншыновых прав. В діскусіях брала участь і Олена Папуґа, котра є державным секретарьом Міністерства про людьскы права, права меншын і соціалный діалоґ. Участный на форумі быв і председа Народного совіту Русинів Борислав Сакач.

На засїданю были участны чісленны представителї світовых і европскых інштітуцій, Орґанізації Соєдиненых народів, Орґанізації про безпечность і сполупрацу в Европі, Рады Европы, представителї сербской влады, як і представителї народны совітів меншын у Сербії.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Жрідло фотоґрафії: РутенпреС.